Маусым қорытындысы. Сұңқар

Командалардың Қазақстан жастар чемпионатының кезекті маусымындағы өнерін қорытындылауды жалғастырамыз. Бүгін әңгіме «Сұңқар» туралы болмақ.

Нәтиже

Тұрақты чемпионат қорытындысы бойынша оралдықтар жетінші орынға ие болып, плей-оффтың алғашқы кезеңінде елордалық «Барысқа» серияда 0:3 есебімен жол берді.Команданың кубок кезеңінің тұрақты қатысушысына айналғанына ешкім күмән келтірмейді. Алайда соңғы үш чемпионатта «Сұңқар» плей-оффтың алғашқы айналымынан аса алмай келеді. Ал 2023 жылы команда жартылай финалға дейін жетсе, одан бір маусым бұрын күміс жүлдегер атанған болатын.Қызықты дерек: соңғы бес жылда плей-офф кезеңінде «Сұңқардың» жолын небәрі екі команда ғана кесті – «Барыс» пен «Ақтөбе». Оның үстіне бес матчтың төртеуінде дәл осы ұжымдар кейін чемпион атанған.

Оқиғалар

Батысқазақстандықтар чемпионаттың соңғы бөлігін өте сәтті өткізіп, соңғы 10 кездесудің 8-інде жеңіске жетті. Оның ішінде қазіргі чемпион «Астана» мен кейін қола жүлдегер атанған «Торпедоны» да ұтты.Осы аралықта команда небәрі 11 шайба жіберіп алды, ал «Сұңқардың» қақпашылары 6 матчта өз қақпаларын голдан аман сақтап қалды. Қақпашы Игнат Яговкиннің «құрғақ» сериясы ерекше назар аудартады. Төрт ойынға жуық созылған бұл көрсеткіш 172 минут 24 секундқа жетті.

Көшбасшылар

Оралдық команданың тағы бір өкілі Абай Шәріпов тойтарылған соққылар пайызы (91,6%) бойынша чемпионаттың үздік бес қақпашысының қатарына енді. Бір қызығы, «Алматының» қақпашысы Александр Павлов пен «Барыс» ойыншысы Арсений Кучковскийден айырмашылығы небәрі 0,1 пайызды ғана құрады.Михаил Черников команданың үздік бомбардирі атанып қана қоймай (16 шайба және 25 нәтижелі пас), маусымдағы барлық 51 матчқа қатысты.Сондай-ақ «Сұңқардың» үздік мергені Сергей Иваницкий де жоғары деңгейде өнер көрсетті. Ол тұрақты чемпионаттың небәрі 28 ойынында 19 шайба соғып, 11 нәтижелі пас берді.

Цитата

– Біздің алдымызда әрдайым ең жоғары мақсаттар тұрады, кем дегенде – финалға шығу. Бұл туралы көпшілік алдында ашық айтылған жоқ, бірақ команда ішінде біз дәл осы мақсатқа ұмтылып, ойыншыларды соған бағыттадық, – деді «Сұңқардың» бас бапкері Сергей Егоров.– Маусым біркелкі өткен жоқ: бірде алға жылжысақ, бірде қайта шегініп отырдық. Біз жүз пайыздық гол соғу мүмкіндіктерін пайдалана алмағандықтан жеңіліп қалған матчтар аз болған жоқ. Қазір негізгі назарды ойыншылардың жеке шеберлігін дамытуға аударып отырмыз.

Қорытынды

Маусым бойы «Сұңқардың» басты мәселесі – гол соғу сәттерін тиімді пайдалана алмауы болды. Команда шабуылда жеткілікті мүмкіндік жасағанымен, ойыншылар шешуші сәттерде әрдайым ұтымды шешім қабылдай алған жоқ.Сонымен қатар, құрамды күшейту үшін Оралға шақырылған тәжірибелі хоккейшілердің барлығы бірдей өз деңгейінде өнер көрсете алмады.Үлкен ықтималдықпен «Сұңқар» басшылығы команданың жас әрі болашағы зор негізгі құрамын сақтап қала алады. Дегенмен, алдағы маусымда матчтардың тағдырын шешуге қабілетті тәжірибелі ойыншыларсыз жоғары нәтижеге қол жеткізу қиын болмақ.

ВКонтакте, Инстаграм < Бізге қосылып, Jas Hokei Ligasy жаңалықтарын өзіңізге ыңғайлы платформалардан оқыңыз.