Андрей Шевченко: «Маусым соңында жігіттер жанкештілікпен ойнап, матчты лайықты аяқтауға тырысты»

«Горняктың» бас бапкері команданың Jastar Ligasy-ның кезекті маусымындағы өнерін қорытындылады.

- Андрей Александрович, чемпионат басталар алдында қойылған міндеттерді орындай алдыңыздар ма?

- Біз үшін бұл өте ауыр маусым болды, бәлкім, клубтағы жұмысымдағы ең қиын кезеңдердің бірі шығар. Жеңістер аз болды, сондықтан баға – қанағаттанарлықсыз. Біз аутсайдер болдық әрі өз мәселелеріміздің тұтқынына айналдық, сондықтан қойылған міндеттерді орындау өте қиынға соқты. Негізгі мақсат – соңғы орын алмау еді. Алайда биыл «Мунайшымен» де орындарды бөлісе алмадық. Қорытындысында оларды тек бір матчта ғана жеңдік. Міндет орындалмады.

- Қорытынды нәтижелерге қандай негізгі факторлар әсер етті?

- Негізгі себеп – құрамдағы ротацияның жетіспеуі. Бәсекеге қабілетті команда жасақтауға тереңдік болмады. Ойын тәртібі мен қорғаныстағы позициялық әрекеттерде де мәселелер туындады. Ең басты проблема – қажетсіз көп аластату алу. Ойыншылар уақытында ауысып үлгермей, қарсылас «жаңа күшпен» шығып, бізді аймақта қыспаққа алатын. Соның салдарынан іліп қалу және басқа да ережебұзушылықтар жиіледі. Маусым соңына қарай алға ілгерілеу байқалды: жігіттер жанкешті ойнай бастады, бар күшін салды және матчтарды соңына дейін күресіп, лайықты түрде аяқтауға тырысты.

- Команда күрделі кезеңдерде психологиялық қысымды қалай еңсерді?

- Ірі жеңілістерден кейін психологиялық тұрғыдан еңсе тіктеу оңай болған жоқ. Біз қателіктерді дер кезінде көріп, кімнің қай тұста кемшілік жібергенін түсіну үшін тұрақты түрде бейнеталдаулар өткіздік. Маусым соңында жігіттерді жігерлендіруге тырыстық, басқа матчтардағы тартысты әрі қатаң күрестің мысалдарын көрсетіп, мотивация бердік.

- Бапкерлер штабы чемпионат қорытындысы бойынша қандай тұжырымдар жасады?

- Негізгі қорытынды – бәрін кадрлар шешеді. Осы мүмкіндікті пайдаланып, жанкүйерлерге қолдаулары үшін алғыс айтқым келеді. Келесі маусымда жеңіске жиі жетіп, жанкүйерлерді қуанта алатын бәсекеге қабілетті команда жасақтауға тырысамыз. Матчтарға келіп, бізді қолдаңыздар, бұл біз үшін өте маңызды.

ВКонтакте, Инстаграм < Бізге қосылып, Jas Hokei Ligasy жаңалықтарын өзіңізге ыңғайлы платформалардан оқыңыз.